Matalinong aso, natunton ang bagong silang na sanggol na itinapon sa basurahan

Nang dahil sa tulong ng isang aso, nadiskubre ang isang bagong-silang na sanggol sa tambakan ng basura sa bayan ng Sibonga sa Cebu.

Sa ulat ng Sibonga Police station, natagpuan ang sanggol na lalaki ng isang motorcycle rider na dumadaan sa Bgy. Magcagong bago magtanghali noong Huwebes, bisperas ng Pasko.

Kuwento ng rider na si Junrell Revilla, kinahulan siya doon ng isang itim na aso para sundan ito papuntang garbage dumpsite.

Doon nakita ni Revilla ang baby na nakabalot ng brown na tuwalya, habang nasa tabi ang isang itim na plastic bag na naglalaman ng kanyang placenta.

Ayon sa pulisya, naiwan pa ang umbilical cord ng sanggol.

Dinala ni Revilla ang sanggol sa Deiparine Community Hospital para mabigyan ng medikal na atensyon.

Pinangangalagaan siya ngayon ng Municipal Social Welfare and Development Office ng lugar.

Sinusubukan naman ng pulisya na hanapin ang magulang ng sanggol.